Næstkomandi mánudag klukkan 15 verður málstofa á Keldnaholti. Fyrirlesari er Járngerður Grétarsdóttir, lektor og plöntuvistfræðingur. Kynntar verða niðurstöður tilrauna með dreifingu fræslægju á röskuð svæði. Tilraunirnar voru unnar á árunum 2007-2009 á framkvæmdasvæði Orkuveitu Reykjavíkur á Hellisheiði og eru hluti af stærra verkefni sem nefnist Endurheimt staðargróðurs á röskuðum hálendissvæðum. Flutningur og dreifing fræslægju felst í því að gróður er sleginn á gjafasvæði að hausti eftir að fræþroska lykiltegunda er náð og fræslægjunni dreift strax á ógróið viðtökusvæði sem ætlunin er að loka með staðargróðrinum.

Föstudaginn 5. nóvember verður haldin ráðstefna til heiðurs íslenska birkinu. Ráðstefnan verður að Reykjum í Ölfusi. Við landnám er talið að birki hafi þakið stóran hluta láglendis Íslands og var lengi vel eina trjátegundin sem myndaði skóga. Þá var birkið einnig lengi vel mikilvægasta tréð í íslenskri garðrækt. Í seinni tíð hafa verið fluttar inn ýmsar trjátegundir til að rækta í görðum og skógum landsins og lögð áhersla á að finna réttu kvæmin af hverri trjátegund fyrir sig. En hvernig hefur verið hlúð að ræktun og kynbótum á birkinu á síðustu árum? Um það verður fjallað á ráðstefnunni.

Halldóra Lóa Þorvaldsdóttir, námsráðgjafi við LbhÍ, hefur undanfarið setið á Alþingi sem varamaður. Á dögunum var rætt um málefni háskólanna á Alþingi og þá sagði Halldóra Lóa í þingræðu meðal annars mikilvægt að tryggja fjölbreytt grunnnám á háskólastigi og að sterkir námsmenn leituðu í framhaldsnám. “Það má ekki gerast að við missum út sértækt nám og glötum þar með þekkingu sem við höfum byggt upp í gegnum árin í gegnum rannsóknir og vinnu,”sagði Halldóra Lóa og bætti við að stjórnvöld yrðu – líkt að menntamálaráðherra hefði gert – að ráðfæra sig við háskólastofnanir landsins og vinna með þeim að ásættanlegri heildarlausn.