Meginmarkmið kennslusviðs er að annast alla stjórnsýslu um kennslu og tryggja gott skipulag á daglegu kennslustarfi háskólans og veita nemendum og starfsfólki almennar upplýsingar og þjónustu. Kennslusviðinu er stýrt af aðstoðarrektor kennslumála sem hefur forgöngu um samræmingu námsins og ber ábyrgð á vottunar og gæðamálum námsins í heild og annast tengsl við aðrar menntastofnanir á sviði kennslusamstarfs.

Kennslustjóri annast daglega verkstjórn og forstöðu kennsluskrifstofu. Kennsluskrifstofa sér um móttöku og skráningu nemenda, stundarskrárgerð og annað sem varðar skipulag á framkvæmd kennslu, próftöflugerð, prófahald, rafræna ferilskrá nemenda og útskriftir skírteina og vottorða ofl. Á kennsluskrifstofu er einnig alþjóðafulltrúi sem annast þjónustu við erlenda gestastúdenta og stúdenta LbhÍ sem sækja nám sitt að hluta til erlendra menntastofnana. Alþjóðafulltrúi er staðgengill kennslustjóra í fjarveru hans. Skólafulltrúar annast almenna móttöku, skráningar ofl.

Námsbrautarstjórar annast faglega umsjón námsbrauta og hafa eftirlit með framkvæmd kennslu á viðkomandi námsbraut og frumkvæði að þróun og gæðastarfi á vettvangi brautarinnar. Þeir gera tillögur í samvinnu við deildarforseta um breytingar á námsbrautum og vali á kennurum, bæði fastra kennara og aðfenginna kennslukrafta. Námsbrautarstjóri annast fagleg samskipti við kennara og nemendur sinnar brautar.

Kennslunefnd er skipuð aðstoðarrektor kennslumála, sem er formaður, kennslustjóra, námsbrautarstjórum og þremur fulltrúum nemenda, úr starfsnámi, grunnnámi og rannsóknanámi. Staðgengill kennslustjóra er ritari nefndarinnar. Kennslunefnd fjallar um kennsluskrár fyrir einstakar námsbrautir, mótar reglur um skráningu og eftirlit með framvindu náms, skilgreinir námskröfur, setur meginreglur um námsmat og mat á öðru námi, fylgist með gæðum náms og kennslu og ákveður úrbætur eftir því sem þörf gerist í samvinnu við yfirstjórn háskólans. Jafnframt fjallar kennslunefnd um málefni sem varða tæknileg atriði í námi og kennslusamstarfi við aðrar háskólastofnanir. Kennslunefnd sker úr um ágreiningsmál sem upp kunna að koma í framkvæmd kennslu eða námsmats.

Nemendur koma að stjórnun og ákvörðunum í gegn um fulltrúa í háskólaráði, kennslunefnd, með þátttöku í innra gæðastarfi (kennslumati), virkri umræðu við stjórnendur og starfslið og í gegn um samstarfsvettvang rektors og nemendafélags.